P14 milyones drugas nasakmit sud sa tulo ka adlaw

CEBU, Philippines — Dili moubos sa P14 milyones nga kantidad sa ilegal nga druga ang nasakmit ug 269 ka tawo ang nasikop sa tibuok nga Central Visayas sa tulo ka adlaw nga Synchronized Enhanced Managing Police Operations (SEMPO).

Gisugdan ang SEMPO sa tungang gabii sa Pebrero 24 hangtod 11:59 PM sa Pebrero 26, 2021 nga nag focus sa iligal nga droga, iligal nga sugal, loose firearms ug accounting sa mga wanted persons.  Sa press conference sa PRO-7  kagahapong adlawa, giingong 679.34 gramos nga shabu nga adunay gibanabana nga kantidad nga P4,619,512  ang nasakmit sa 228 ka operasyon nga ilang gilusad.

Niresulta sab kini sa pagkapatay sa duha ka mga suspek. Samtang, sa kinatibuk-an, 72,500 ka gramo nga marijuana ang nasakmit sa susamang panahon nga adunay gibanabana nga kantidad nga P8,700,000.00.

Duna say 315 ka tawo ang nadakpan tungod sa illegal nga sugal ug P26,217 nga hiniusang mga pusta sa sugal ang nasakmit.

Ang kapolisan nakasakmit sab og 284 ka loose firearms ang uban niini gitahan sa naghupot niini, tulo ka eksplosibo ug 33 ka tawo sab ang nadakpan sa 242 ka operasyong gilusad.

Samtang 468 ka mga wanted persons ang nadakpan, ang 36 niini pulos mga 'Most Wanted Persons' sa lain-laing gibug-aton sa krimen nga ilang nabuhat.

Matud kay Police Brigadier General Ronnie Montejo PRO-7 Chief ang tumong sa SEMPO mao ang pagpakgang sa mahitabo palang nga mga krimen. IBM (BANATNEWS)