Mga motorcycle riders batok motorcycle dealers

CEBU, Philippines — Mga nagkalain-laing organisasyon sa mga nanginabuhi gamit ang motorsiklo ug kadtong mga mahiligon lang gyud og motor nagpahigayon og unity ride  kagahapon sa buntag agi og pagpakita og suporta kang Land Transportation Office-7 director Victor Caindec Jr.  Nanukad ang mga motorista sa may Cebu South Coastal Road agi sa Natalio Bacalso Avenue, V. Rama, Fuente Osmeña, Capitol, Escario, Lahug, Apas, North Reclamation Area ug hunong sa Plaza Independencia.

Si Moises Deparine, usa sa mga nisalmot miingon nga buot nilang ipakita ug ipaabot ngadto sa mga hingtungdang ahensiya sa gobiyerno ang ilang mga reklamo batok  sa mga motorcycle dealers nga nakabingkil karon ni Caindec. Si Caindec niatubang kagahapon sa Senate Blue Ribbon Committee bahin sa gihimong imbestigasyon kalabot sa isyu. Buot sa riders madungog ilang yangungo batok niining mga motorcycle dealers nga dugay kaayong mo-release sa ilang OR/CR sa gipalit nilang mga motor.

Gawas pa niana, dugay mahatag ang plaka, dunay mga motor nga giembargo taliwa niining pandemya kay wala makabayad  ug dunay ubang dealers nga dili mobaligya og cash kay gusto nila nga installment basis. Sa installment basis, madoble ang ilang interes nga makolekta. Kun maembargo nila ang motor mahimo nila kining padatahan nasab sa lain ug duna na say laing interes. Gihulagway kini sa mga motorcycle riders nga dili makiangayon.

“According to LTO kung ma-process lang gyud og tarong ang atoang mga papeles sa atong motor mokabat ra gyud siya og 5 to 7 days, ma release na ang OR/CR sa motor pero kanang moabot og 3 months murag dili na gyud siya normal especially moabot gyud ang time ma impas na ang motor wa pa gyud gihapon (narehistro).

Naa gyuy something wrong sa motorcycle dealers kay kung LTO daghan na kaayo gipangayo sa LTO mo-release man gyud sila,” sigon ni Deparine.

Tungod kay wala pay klaro ilang rehistro dili nila ma-maximize ang gamit sa ilang gipalit nga motor tungod kay peligro og madakpan sila o ba kaha malamabigit sa disgrasya unya modako na hinuon ilang traffic violations. — IBM (BANATNEWS)