12 ka doktor gidakop sa kalapasan sa curfew

CEBU, Philippines — Niabot sa 166 ka nakalapas sa curfew lakip na ang 12 ka giingong doktor ang gidakop sa mga operatiba sa Cebu City Police Office atol sa Oplan Bulabog niadtong Biyernes sa gabii.

Matud ni Raquel Arce, pangulo sa Prevention, Restoration, Order, and Beautification, and Enhancement (PROBE) Team nga kauban sa kapolisan, nga ang mga doktor dali nga nipakita sa ilang mga ID.

Ang mga doktor nadakpan sa usa ka resto bar sa Barangay Banilad.

Giklaro ni CCPO Deputy Director for Operations Wilbert Parilla nga ang mga authorized persons outside of residence (APORs) wala magpasabot nga ang usa mahimo nga makalakaw-lakaw, mag-inom-inom ug uban pang kalingawan sa pangpublikong lugar sa mga oras sa curfew.

Matud niya nga ang mga APOR gitugutan lang nga mogawas sa ilang mga pinuy-anan sa panahon sa ilang call of duty.

“Dili nimo magamit imong paka-APOR kun naa ka sa imnanan. Unya considering nga doctors sila, sila maoy nagkuan anang health protocols nga dili magtapok-tapok ug dili mag-inom, so dapat sila pud ang mag-ulo, dili kay sila mangulo sa pag-inom-inom sa agawas,” dugang ni Parilla.

Ang tanang gipangdakop gitugyan sa PROBE ug gidala sa Tejero Gym alang sa usa ka seminar.

Matud ni Arce nga sa 166 ka tawo, 116 niini ang nibayad og P500 nga multa lakip na ang mga doktor samtang ang uban nipili nga mohatag og walo ka oras nga community service. Niadtong Miyerkules adunay 44 nga gidakop sa kapolisan ug 130 niadtong Huwebes sa gabii.

Matud ni Arce nga anaa sa ilang pagbuot kun pabayron pa ba ang mga nakalapas sa ikaduhang higayon o pasakaan na kini og kaso. Giklaro ni Parilla nga ipadayon nila ang pagpatuman sa Oplan Bulabog bisan human sa Fiesta Señor hangtud mominus ang mga nagpositibo sa Covid-19 sa siyudad.

Giawhag ni Arce ang publiko nga magmatngon ug mahimong responsable aron mahunong ang pagsaka sa mga positibo sa COVID-19.

“Ang matabang gyud sa matag usa, stay at home. Kun mag-inom man gani ta, anha ra sa balay with the family, dili sa gawas. Unya og pananglitan gyud dili malikayan kay adunay occasion, mindful nalang ta sa atong oras,” dugang niya.  

Gibutyag usab ni Parilla nga laing upat ka establisemento ang giisyuhan og show cause order sa Business Permit and Licensing Office (BPLO) tungod sa pag-operate sa oras sa curfew ug sobra nga pag-serve of ilimnon sa mga kustomer.

Base sa executive order ni Mayor Edgardo Labella, gilimitahan lang ang pag-serve sa duha ka botelya matag kustomer.

“Ato lang klaruhon nga ang mga imnanan wala pa gyud na sila gitugot nga mag-open. Ang pwede ra ang mga restaurants, pwede sila maka-serve og liquors,” sigun ni Parilla.

Samtang giklaro ni Parilla nga ang pagpakatap sa mga tanke sa Cental Command sa Barangay Pasil, Sawang Calero, Suba ug Ermita sukad niadtong Biyernes sa gabii kabahin usab sa Oplan Bulabog.

Kini aron mapugngan ang pagtapok ug mapatuman ang mga health protocols kalabot sa duha ka adlaw nga pagsaulog sa piyesta sa mga barangay.

Gipahinumduman ang mga barangay kapitan nag did-an ang paghimo og mga party.

Giawhag usab ang kabalayan nga magsaulog sa piyesta nga kauban ra ang ilang pamilya ug gitambagan nga dili mopasulod og bisita. (BANAT NEWS)