Nanulis og taksi, usa napatay

CEBU, Philippines — Patay ang usa sa lima ka tawo nga gipasanginlang mitulis sa taxi nga ilang gisakyan tulo sa mga suspek ang nadakpan samtang nakaikyas ang usa nila ka kauban. Ang pagpanulis nahitabo sa miaging gabii sa Sangi Road, Barangay Pusok sa Dakbayan sa Lapu-Lapu.    

Si Police Captain Airbert Jay Samson, hepe sa Presinto 5 sa Lapu-Lapu City Police Office (LCPO) miila sa namatay nga mao si Melbert Soroño nga giingong misukol sa mga polis nga nigukod kanila sa ilang pag-ikyas.

Giila usab ang mga nadakpan nga mao sila si Jilbert Ornopia, Leonito Tejana ug Bryan Tañedo nga mga taga Sta. Catalina, Negros Oriental.                  

Samtang giila usab ang nakasibat nila nga kauban nga mao si Edwin Banjao nga giingon naglingkod sa luyo sa driver nga biktimang si Melchor Antipuesto .                         

Nasayran nga ang mga suspetsado pulos nagtrabaho sa usa ka pribadong tighakot og basura base sa gitug-an sa guwardiya sa ilang trabahoan. Matud pa sayo pa sa gabii naggawas sa compound ang lima kay manuroy.

Ang taxi driver nga si Antipuesto mitug-an sa kapolisan nga gipara siya sa lima diha sa Barangay Pusok kay magpahatod  sa luyo nga bahin sa Lapu-Lapu City Hall. Apan paglabay  sa Matumbo  Road, ang usa sa upat nga naglingkod sa luyo namulong sa pinakalma lang nga tingog “Ay tulis  diay ni kuya.”                                 

Dihadiha giingong gitabangan siya og tuok sa duha nga naglingkod sa iyang tapad ug sa laing mga naglingkod sa luyo.

Apan swerte nga naablihan niya ang pultahan dayong karatil og dagan ug nakapangayo og tabang sa nasugatan nga lalaki nga nagsakay og motorsiklo.                           

Ang mga suspetsado nanggawas usab sa taxi ug nanagan apan nasigpatan sa mga marshals sa parking lot. Gisita sila apan nagpakaaron-ingnon silang gipareglahan.                 

Wa magdahom ang tulo nga moabot si Antipuesto ug mitumbok kanila nga gitulis siya hinungdan sa ilang pagkasikop.            

Gisusi karon kun kaning grupoha mao ang responsable sa sagunson nga pagpanglungkab sa mga buhatan sa city hall nga sagad mahitabo matag Sabado ug Domingo. /IBM (BANATNEWS)