Drug ex-convict gi-salvage

CEBU, Philippines — Napalgang patay ang usa ka kanhi binilanggo diha sa Sitio Manuto, Barangay Manipis, Dakbayan sa Talisay niadtong Lunes sa hapon.

Si Kapitan Joselito Laurente sa Barangay Manipis niingon nga trabahante sa QM Builders maoy nakakita sa patay nga lawas sa tawo samtang sila nag- clearing operation sa lugar.

Matud pa ni Laurente nga nakapanimaho sila og bahong patay hinungdan nga sila nakisusi ug ilang nakit-an ang lawas sa lalaki nga ang kamot ug tiil gigapos samtang ang ulo giputos og itom nga panapton.

Ang mga sakop sa Scene of the Crime Operations (SOCO) nakarekuber og duha ka kabhang sa .45 nga bala sa crime scene.

Kagahapon sa kaadlawon, nibutho si Loreta Royo Zamora, 52, taga A. Lopez, Syudad sa Sugbo ug nagpailang inahan sa biktima ug giila niya kini nga si Archie Royo Zamoro, 20.

Ang kapuyo niini nga si Neki Lendo nitug-an nga niadtong Oktubre 8 ning tuiga gidagit  si Royo sa mga lalaking nagsakay og itom nga sakyanan.

Daling nailhan ang lawas tungod sa tattoo niini sa walang bukton nga adunay suwat nga “Neki Lendo” samtang “BC 45” sa iyang sampot.

Ang BC 45 o Batang Cebu 45 patik kini sa mga inmates nga mapriso sa Cebu City Jail.  Si Zamora nadakpan niadtong tuig 2018 gumikan sa pagpayuhot og ginadiling drugas. Nakagawas kini niadtong Marso ning tuiga pinaagi sa probation.

Si Police Major Gerard Ace Pelare, pangu sa Talisay City Police Station nibutyag nga posibleng didto ra gipatay ang biktima gumikan sa kamingaw sa lugar.

Padayon pa ang ilang pakisusi kung kinsa ang responsable sa krimen. /IBM (BANATNEWS)