Cebu City moapelar sa DOH

CEBU, Philippines — Ang kagamhanan sa Dakbayan sa Sugbo moapelar sa desisyon sa Department of Health (DOH) kalabot sa pagdumili sa maong ahensiya sa paghatag og permit alang sa katukoran sa sam-ang diha sa Barangay Sapangdaku alang sa mga nangamatay sa COVID-19.

Matud ni Konsehal Dave Tumulak kinsa maoy nangamahan sa ordinansa alang sa katukoran sa maong sam-ang nga ang mga concern nga gipadayag sa DOH matubag ra kini pinaagi sa development plan.

Sayo pa, ang DOH nihatag kini og mga rason nga dili angayang ipadayon ang maong proyekto lakip usab ang balay nga naa sa maong lugar nga gipuy-an sa caretaker.

Si Tumulak nipasabot nga ang balay pahulayan lang kini sa tawo nga nag-atiman sa  luna. Si Tumulak naglaom nga mahatagan sila og kahigayonan nga mapresentar ang ilang development plan nga magtubag sa mga concern ilabi na nga ang Department of Environment and Natural Resources (DENR) usa sa mga nirekomendar sa lugar.

Matud usab ni Tumulak nga ugaling mapakyas sila sa ilang tinguha ilahang itahas usab ngadto sa DENR sa pagrekomendar na usab og laing luna alang sa tukoron nga sam-ang ug mobalik na usab sila sa sinugdanan.

Hinungdan nga moapela sila sa DOH nga hatagan sila og kahigayonan nga matubag ang tanang technical concern sa siyudad ug marekonsiderar ang ilang plano base sa development plan. Tinguha ni Tumalak nga aduna nay kaugalingong sam-ang ang siyudad human nga kasagaran sa mga sementeriyo ang puno na. /BDB (BANATNEWS)