Marlon Garcia nitaliwan usab
CEBU, Philippines — Sulod lang sa usa ka semana nawad-an og duha igsuon si Gobernador Gwendolyn Garcia ug Kongresista Pablo John Garcia sa 3rd district sa Probinsiya sa Sugbo. Kini human nga si Barili Mayor Marlon Garcia namatay kagahapon sa kaadlawon diha sa usa ka pribadong tambalanan sa Siyudad sa Sugbo.
Si Marlon kinsa nagpangedaron og 58-anyos namatay lima ka adlaw human ang iyang igsuon nga kanhi mayor sa Lungsod sa Dumanjug Nelson Garcia namatay niadtong Septiyembre 1, 2020.
Kagahapon si Nelson gihatod kini sa iyang kataposang pahulayan.
Kagahapon usab ang pamilyang Garcia nipagawas og statement apan wala gibutyag ang hinungdan sa kamatayon ni Marlon.
"In the weeks leading to his untimely passing, Mayor Marlon was eager to be discharged so he could continue on in his relentless efforts for the economic revival of Barili", tipik sa pamahayag sa pamilyang Garcia. Si Marlon maoy ikaunom nga anak ni kanhi gobernador Pablo "Pabling" Garcia ug kanhi Judge Esperanza “Inday” Fiel Garcia.
Samtang si Nelson maoy ikaupat sa managsuong Garcia ug ang gobernador maoy kamagwangan samtang ang kongresista maoy kamanghuran.
Si Marlon napiling mayor sa Barili sukad niadtong tuig 2016 ug napili usab siya nga bise mayor sa lungsod ug napiling bise presidente sa Internal Affairs of the League of Municipalities of the Philippines - Cebu Chapter. /BDB (BANATNEWS)
- Latest
