Sitio sa Alegria gi-lockdown, dili magsul-ob og face mask sa Sta Fe pamultahon na

CEBU, Philippines — Gipaubos sa lockdown sa lungsod sa Alegria ang Sitio Cambunoc Sta Filomena human nakatala og kaso sa covid-19.

Sa Executive Order nga giluwatan ni Mayor Verna Magallon gisaysay nga upat ka mga tawo ang natakdan sa covid-19 didto sa maong lugar.

"There is a need to intensify measures to mitigate and prevent the spread of covid-19 in the Municipality of Alegria" pagbasa sa EO ni Magallon.

Samtang didto sa lungsod sa Sta Fe isla sa Bantayan gipanghingosgan na sa LGU ang pagpatuman sa pagsul-ob og face mask sa tanang mga tawo nga mogawas.

Adunay multa kon molapas sa Municipal Ordinance No. 10-2020

"Ang madakpan nga milapas niining maong balaod, pabayron sa multa nga 300.00 alang sa first offense, 500.00 sa second offense ug 2,000.00 sa third offense" pagbasa sa post sa Mayor's Office - Sante Fe facebook page.

Ang mga mogamit sa disposable face mask kinahanglan usab nga ilahi sa ordinaryong basura inig labay. Kolektahon kini sa adlaw nga Sabado ang schedule sa pagkuha sa special waste. —/MEL (BANATNEWS)