Talisay City Hall temporaryong isirado sugod ugma

CEBU, Philippines — Temporaryo nga isirado ang Talisay City Hall sugod ugma adlaw nga Martes hangtud sa Biyernes, Hulyo 17, 2020 alang sa pagpahigayon og disinfection diha sa tibuok compound sa City Hall matud ni Mayor Gerald Anthony “Samsam” Gullas Jr.

Apan ang buhatan sa mayor bukas gihapon kini tungod kay anaa man nahimutang ang command center.

Ang operasyon sa mga buhatan sa City Hall gikatakdang mobalik sa Hulyo 20, 2020 adlaw nga Lunes.

Si Gullas nagkanayon nga human sa nahitabong pagkamatay ni Nona Narca, assistant budget officer sa dakbayan mohimo sila og contact tracing sa mga kawani nga nakauban niini sa pipila ka adlaw.

Si Narca kinsa giingong adunay sintomas sa covid-19 ang namatay niadtong niaging semana.

Hinuon ang mga tawo nga nahibaw-ang na-close contact kang Narca ang gipang-isolate na niadto pang Hunyo 24 niining tuiga.

Ang mga kawani nga adunay nakit-ang sintomas ang gipaubos na usab sa swab testing diin ang uban kanila nagpositibo kini sa covid-19 ang gipang-isolate usab ug wala una tugoting motambong sa ilang trabaho. Ang siyudad padayon kining nagpahigayon og contact tracing sa mga tawo nga adunay close contact sa mga nataptan og covid-19.

Ang nahisgutang mga empleyado recovering na kini gikan sa maong sakit.

Matud usab ni Gullas nga mopatuman sila og istriktong infection control protocols aron maprotektahan ang mga kawani lakip na ang publiko nga adunay himuong transaksiyon diha sa city hall. /BDB (BANATNEWS)