PRO-7 gihatagan og mga gamit sa pagtuob

CEBU, Philippines — Moabot sa 50 ka steam inhalation kits ang gidonar sa kagamhanan sa Siyudad sa Sugbo sa Police Regional Office 7 aron makatabang sa mga frontliners nga nakigbatok sa coronavirus disease (COVID)-2019 pandemic.

Nasayran ang steam inhalation o mas naila sa tawag nga tuob proyekto sa kagamhanan sa siyudad nga ilang gihulagway nga makaayo sa panglawas ilabi na sa kadtong dunay ubo, sip-on ug gipanghilantan.

Gani ang siyudad nanghatag man sab og steam inhalation kits sa mga Barangay Isolation Centers aron magamit sa mga Covid-19 patients nga mga asymptomatic.

Buot sa siyudad nga makatabang sa mga frontliners ilabi na sa kapolisan kinsa nakigbatok sa kontra nga dili makita.

Apan sa wala pa ang paghatag sa steam inhalation kits, gipakita una ni Konsehal Jerry Guardo ang paggamit niini human giimbitar siya ni PRO-7 regional director, Brigadier General Albert Ignatius Ferro, pinaagi sa Regional Advisory Council aron mag-demonstrate niini sa mga polis.

“Nalipay kay mi na sila being our frontliners makatabang ni nila because there have been a lot of testimonies nga nagamit sila’g tuob, daghan positive kaayo ang feedback nga naayo sila,” sigun ni Guardo.

Sa paghimo sa steam inhalation, si Guardo niingon nga dili ra mogasto og daku ang mga tawo nga mosuway niini sanglit ang gikinahanglan mao ang tualya, planggana, init tubig nga pwede sagulan og tanom nga kalabo, eucalyptus oil ug uban pa.

Mahimo kini buhaton sayo sa buntag human maligo ug sa dili pa molakaw ug inig-uli maligo sa balay dayun mag-tuob.

Subay niini, si Ferro niasoy nga kadtong mga polis nga nagpositibo sa Covid-19 nihimo sa steam inhalation ug iyang gipapahibawo nga usa nalang niini ang ang symptomatic.

Ayuhon sab nila ilang “Makatao, Malasakit Center” aron mabalhin ang ilang mga tawo nga naa karon sa mga BICs sa Siyudad sa Sugbo.

Matud ni Ferro nga wala’y mabiyaan sa mga tawo niini ug kadtong mga naapektuhan sa virus duna sila’y lahi nga pamaagi nga giumol. /GMR (BANATNEWS)