Mga naninda nasakpan nagpamahal sa presyo
CEBU, Philippines — Tulo ka mga vendors sa Punta Princesa Public Market ang giisyuhan og show cause order sa Cebu City Legal Office gumikan sa paglapas sa price freeze order.
Matud ni Atty. Rey Gealon, pangulo sa CLO, nga ang market administrator na si Jonil Matuguina ang niisyu sa mga kalapasan nga nahimo sa maong mga naninda atol sa inspeksyon ug monitoring sa tanan mga merkado publiko sa dakbayan.
Ang maong inspeksyon pinasikad sa kamanduan ni Mayor Edgardo Labella nga nipagawas og Memorandum Order No. 2020-277 niadtong Abril 14, 2020 nga nagseguro nga dili mabiktima ang mga Sugbuanon sa mga mapahimuslanon nga magpapatigayon niining panahon sa krisis.
Atol sa pagpahigayon og inspeksyon ug monitoring, ang presyo sa prutas ug utanon nisaka ang presyo gikan sa 30 hangtud sa 100 ka porsyento.
Ang maong mga vendors gihatagan og tulo ka adlaw nga mosumiter sa ilang tubag kung nganong dili sila angayan nga pahamtangan og tukma nga silot. /GMR (BANATNEWS)
- Latest