Tanke dili na pasudlan sa mga dili residente

CEBU, Philippines — Wala na pasudli ang Barangay Tanke, Dakbayan sa Talisay sa mga tawo nga dili residente sa maong lugar sugod sa niaging semana.

Ang maong sestema nga gipatuman kalabutan kini sa ilang gipahugtan nga seguridad batok sa krisis sa virus nga giatubang karon.

Ang mga kapolisan maoy mosita sa mga tawo nga musolod sa lugar nga dili mga mulopyo.

Ang maong implementasyon giuyonan usab sa konseho sa barangay.

Si konsehal Teofilo Daitol nagkanayon nga gawas sa virus nga ilang gikabalak-an mas menos na usab ang mga tawo nga ang tuyo mao lang ang pagsamok-samok diha sa ilang barangay sama sa mga nalambigit sa ilegal nga drugas.

Ang ubang mga barangay nihimo usab sa ilang inisyatibo sa pagsira sa ilang lugar aron dili makasulod ang mga dili residente aron mapugngan ang pakuyanap sa virus.

Si Mayor Gerald Anthony “Samsam” Gullas Jr. nihangop sa maong lakang sa katawhan sa paghimo og pamaagi aron maprotektahan ang ilang kaugalingon lakip na ang ilang pamilya batok sa virus.

Ang mga residente sa usa ka lugar  makasulod kong aduna silay quarantine pass ug magsul-ob og facemask samtang ang dili residente kutob lang sila diha sa barikada nga gibutang sa mga residente ug patawagon lang kini sa tawo nga ilang tuyo. / BDB (BANATNEWS)