Di kinahanglang magsuot og facemask

CEBU, Philippines — Ang kompirmasyon nga nakasud na dinhi sa nasud ang makamatay nga sakit nga novel Coronavirus ug ang kawalay kasigurohan kun duna na bay bakuna batok niini dili kalikayan nga mabalaka ang publiko mao nga ang uban nag-panic buying og surgical mask pangproteksyon.

Apan kinahanglan ba gyung magsuot gyud niini ang tanan aron dili matakboyan sa maong sakit?

Ang tubag sa Department of Health 7 dili “generally recommended” nga magsul-ob og facemask ang katawhan bisan dunay hulga sa nCoV.

Si Dr. Jaime Bernadas, ang director sa DOH7 miingon nga kadto rang mga tawong adunay gipamati sa lawas ug mga biyahidor maoy kinahanglang magsuot niini. Matud niya, self- limiting virus ang nCoV kay mawagtang o mamatay ra kini sulod sa pipila ka adlaw.

Matud pa niya mas maayong buhaton sa mga tawo ang kalimpyo sa kanunay sa panglawas sama sa paghugas sa mga kamot matag karon ug unya ug paglimpyo sa ilang palibot aron dili basta mataptan sa mga sakit.

Si Cebu City Mayor Edgardo Labella sa iyang bahin mipasusi na kabahin sa report nga dunay mga botikang nagpaburot sa presyo sa facemask.

“There are reports according to Councilor Tumulak that some drugstore are increasing prices of face masks, alcohol, and soap. I said to the DTI officer that they can inform the City Government and we will ask the assistance of the police to implement this law that prevents taking of advantage of the misery of the situation by increasing the prices,” matud sa mayor.

Giasoy ni Konsehal David Tumulak nga adunay pito ka mga botika ang nagpatubo sa presyo sa ilang mga face masks ug uban pang kinahanglanon sa sanitasyon nga gikinahanglan sa publiko ug nakalapas sa RA 7581 sa Consumers Act, ug sa RA 10121 Disaster Risk Reduction law.

Ang maong mga botika nagbaligya og disposable surgical mask sa presyo nga P3 apan karon P5 hangtud P8 na ang usa. Samtang ang presyo sa N95 mask gikan sa P45 karon tag P250 na matag usa. Decemay Padilla/IBM (BANATNEWS)