LTFRB-7 moisyu og special permits atol sa Pista Senyor

CEBU, Philippines — Gipaabot nga moluwat og special permits ang Land Transportation Franchising and Regulatory Board 7 aron pagsigurong adunay paigong transportasyon sa mga dumuduong sa umaabot nga kapistahan sa Senyor Sto. Niño pasud, paglibot ug pagawas sa Dakbayan sa Sugbo.

Si LTFRB7 Regional Director Eduardo Montealto nga nahinabi sa Banat News miingon nga ilang paabuton ang rekomendasyon gikan sa Cebu City Transportation Office kung pila ka mga Public Utility Jeepneys ang ilang hatagan og pagtugot nga makabiyahe sa mga rotang dili ila.

Apan sumala pa ni Montealto base sa mga nanglabay nga Sinulog, kasagaran 100 ka special permits alang sa mga PUJs  ang irekomendar sa CCTO. Pagkakaron mao lang una na ilang basehan kung walay kausaban.

Dugang pa ni Montealto ang ilang hatagan ug special permit mao ang mobiyahe ra sa siyudad ug walay bus kung ilang sundon ang susama nga settings sa nilabay nga tuig.

Kutob sa Enero 15 sila magpaabot sa CCTO nga mohatag og rekomendasyon alang niini.

Giawhag ni Montealto ang mga drayber nga likayan gyud ang pagbalibad sa mga pasahero ilabi na nga modagsa gyud ang mga pasahero karong mga semanaha. /IBM (BANATNEWS)