Kagawad namusil bisperas sa Bag-ong Tuig

CEBU, Philippines — Patay ang usa ka 33-anyos nga lalaki human sa nahitabong pagpamusil niadtong bisperas sa Bag-ong Tuig sa Sitio Kalubihan, Barangay Siotes, Lungsod sa Tuburan.

Giila ang biktima nga si Ronald Tanjay, 33, nagpuyo sa maong lugar ug usa ka construction worker sa Dakbayan sa Sugbo.

Matud ni Police Staff Sergeant Mark Anthony Samora, imbestigador sa Tuburan Police Station, nga niadtong nilabay nga buwan adunay gitambongan nga Christmas party sa silingan ang anak  sa biktima ug didto usab si Lenmark Obina.

Dugang pa ni Samora nga ang anak nga lalaki sa biktima nisumbong sa amahan nga gipakauwawan siya atubangan sa mga tawo pinaagi sa paghubo sa iyang karsones.

Nasuko si Tanjay ug gibaharan niya nga makigsinukmagay human nga gipakauwawan ang iyang anak.

Tungod sa kahadlok nisumbong si Obina ngadto kang Konsehal Yolando Ticang. 

Gibutyag sab ni Samora nga sukad pa niadtong Disyembre 26 gipangita na sa mga suspek ang biktima apan wala kini nila makit-i tungod kay wala kini nakauli gikan sa trabaho sa Dakbayan sa Sugbo hinungdan nga gibalikan sa mga suspek niadtong bisperas sa Bag-ong Tuig.

Samtang nangandam sila si Tanjay ug ang kapuyo niini nga si Rogelyn Novicio, giingong kalit nga nisulod si Ticang ug gipugos pagguba ang ilang pultahan ug kalit nga gipusil sa ulo nga bahin ang biktima.

“Gisulod gyud siya sirado man ang pultahan, gilangkat ang pultahan dayon gipusil dayon,” matud ni Samora.

Nigawas si Ticang samtang nag-atang si Obina isip look out dayon sibat sakay sa motorsiklo.

Kusganong gihimakak sa mga suspek ang pasangil batok kanila bisan pa man nga nahitabo ang pagpamusil atubangan sa kapuyo ni Tanjay. /GMR (BANATNEWS)