Gazini gipasigarbo gihapon sa mga Sugbuanon

CEBU, Philippines — Nagguol si Talisay City Mayor Gerald Anthony “Samsam” Gullas Jr. nga pakyas ang pangbato sa Pilipinas nga si Gazini Ganados sa pag-angkon sa korona sa Miss Universe 2019.  Apan nagpabilin gihapon ang garbo ni Gullas ngadto ni Ganados nga nagdala og tingug sa Dakbayan sa Talisay diin siya gikan. Matud sa mayor nga dili tiaw ang naabot ni Ganados hinungdan nga bisan pa man og naa lang siya sa top 20 daku na kini nila nga garbo. Nigawas nga Miss Universe 2019 mao ang pambato sa South Africa. Si Gullas nagkanayon nga siya morekomendar sa konseho nga ilang pasidunggan si Ganados sa nahimo niining garbo sa Talisay.

Kagahapon, sayo pa lang sa buntag daghan na sa mga Talisaynon ang nagtapok sa Talisay City Hall aron motan-aw sa Miss Universe Pageant.

Nagmaya ang mga nanan-aw human nalakip si Ganados sa top 20 apan nikalit lang sab kini og kahilom ug namalik sa ilang trabaho dihang wala na kini nalakip sa top 10. Samtang si Cebu Archbishop Jose Palma mapasigarbuhon gihapon ni Ganados. Matud sa Arsobispo nga wala kana nagpasabot nga dili gwapa si Ganados.

Sumala pa ni Palma nga ang kagwapa sa tawo dili kutob ra sa makita kung dili ang kagwapa nga anaa sa sulod sa iyang kasing-kasing ug angayan lang nga ang mga Pinoy magpasalamat kang Ganados tungod sa pag-apil niini sa Miss Universe. Si Palma mapasigarbuhon gihapon sa maong Sugbuanon nga dalaga nga niapil sa Miss Universe.  GMR (BANATNEWS)