Hepe sa Abellana PS girelibohan

CEBU, Philippines —  Human sa direktor sa Cebu City Police Office, sunod karon nga giparelibohan sa Police Regional Office 7 ang hepe sa Abellana Police Station nunot sa nagpadayong imbestigasyon sa National Bureau of Investigation (NBI) bahin sa kamatayom ni Clarin, Misamis Occidental Mayor David Navarro.  Si PRO7 Director Police Brigadier General Valeriano De Leon miingon nga kinahanglang relibohan si Police Major Eduard Sanchez aron pagwagtang sa pagduda nga naay cover up.

Ang Regional Internal Affairs Service (RIAS) nagsugod na sab sa ilang kaugalingong imbestigasyong administratiba batok sa mga polis kun may lapso sila sa seguridad sa dihang gipatay ang mayor nga naa sa ilang kostudiya.

Si Police Major Elisandro Quijano maoy mohulip ni Sanchez kinsa ibutang sa Regional Personnel Holding and Accounting Unit (RPHAU-7) kauban ang girelibohang si CCPO director Police Colonel Gemma Vinluan.

Si Navarro gibunlot sa mga armadong mga lalaki gikan patrolcar nga gikargahan niini ug gipatay. Padung dad-on sa Navarro sa mga sakop sa Abellana Police Station sa piskalya aron pasakaan og kaso tungod sa reklamo sa duha ka masahista sa dihang 100 meters nalang sa ganghaan sa City Prosecutors Office, kalit silang giatake diha sa dan M. Velez niadtong Oktubre 25.  IBM (BANATNEWS)