Awto nilupad, nagmotor patay

CEBU, Philippines — Patay ang usa 26-anyos nga lalaki kinsa padulong sa trabaho, human kini nadam-agan ug nalagpot gikan sa gisakyan niining motor sa dihang naigo sa nilupad nga awto sa may Barangay San Roque Dakbayan sa Talisay dili layo sa Talisay Fish Port, kagahapon sa buntag.

Ang nakalas naila nga si Marjun Paragoso, taga Barangay Inayagan, Dakbayan sa Naga.  Samtang ang nagmaneho sa awto mao si Kurt Joseph Año, 26.

Matud pa sa pipila ka mga tawo nga nahinabi sa Banat News diha sa lugar, dunay kusog nga paka silang nadungog ug sunod nilang nakita ang awto nga gikan sa Dakbayan sa Sugbo nibangga sa poste sa center island ug nidasmag ngadto sa motorsiklo sa kasugat nga lane.

Giingong nibalitok pa ang awto apan swerte nga wala kini makaangkon ug grabeng mga kadaut sa kalawasan si Año gawas lang sa mga bun-og ug pangos  apan si Paragoso nakaangkon og grabeng kadaot sa ulo ug kalawasan samtang napusgay ang motorsiklo niini hinungdan sa hinanali niini nga kamatayon.

Ang maong hitabo nakamugna og grabeng ka traffic nga niresulta sa daghan nanga late sa ilang mga trabaho ug pagtungha. Matud pa ni Patrolman Ricky Abarquez, sa Talisay City Traffic Police, base sa inisyal niya nga pakighinabi kang Año daw nakatagpilaw kini samtang nagmaneho.

Si Paragoso nagselebrar pa sa iyang birthday niadtong Oktubre 9 apan sa wala pa ang maong adlaw giingong nag-post kini sa social media account niini nga daw nanamilit na sa iyang mga higala. (/IBM)(BANATNEWS)