Halad Inasal di idungan sa piyesta

CEBU, Philippines – Gibana-bana ang 5,000 ka tawo nga motambong sa Halad Inasal Festival sa Dakbayan sa Talisay karong Domingo.

Si Mayor Gerald Anthony “Samsam” Gullas Jr. nibutyag nga sa adlaw unta kini sa kapistahan ang kalihukan sa Oktubre 15 apan siya nakahuna-huna nga mas maayo nga usbon ug himoon kini karong Domingo.

Si Gullas nakigtigum sa kapolisan ug sa kadagkuan sa City of Talisay-Traffic Operation Development Authority (CT-TODA) ug mao sab kini ang ilang gisugyot aron dili kaayo grabeng maapektuhan sa trapik sa adlaw sa kapistahan.

Atol sa kasaulogan, mopasundayag sab ang Parokya ni Edgar sa Talisay City Central School ground ug gilauman nga dagsaon gyud kini sa mga tawo.

Apan si Gullas niklaro nga magsilbi gihapon nga highlight ang parada sa mga inasal ingon man ang pagahimoon nga halad ngadto sa patron nga si Sta. Teresa de Avila.

Ang karsada atol sa maong adlaw masira sa tunga sa adlaw gikan sa buntag hangtud sa alas 12 sa udto. (/GMR)(BANAT NEWS)