Lima ka JO sa Lapu-Lapu positibo sa drugas
CEBU, Philippines – Lima ka mga job-order workers sa Lapu-Lapu City Materials Recovery Facility ang nasuta nga positibo sa paggamit og illegal nga drugas sa gihimong kinalit nga drug test sa ilang buhatan niadtong nakalabay nga adlaw nga Lunes.
Mismo si Mayor Junard “Ahong” Chan mao ang nipahibalo sa resulta atol sa gipahigayon nga press conference kagahapong adlawa.
Matud pa ni Chan sa higayon nga magpositibo gihapon sa confirmatory test ang lima mataktak gayud kini sila sa ilang trabaho.
Ang City of Lapu-Lapu Office of Substance Abuse and Prevention pinangulohan ni Gary Lao mipaubos sa surprise drug test sa 249 ka mga kawani sa MRF apan nasuta nga 241 lang ang nitunga.
Sumala pa ni Chan walay luna sa iyang administrasyon ang mga tigamitan ug illegal nga drugas, mangilkilay ug uban pa.
Andam hinoon siya motabang pagpa-rehab kanila kun moduol sila ug boluntaryong motug-an nga tigamitan kini og illegal nga drugas. Kun magbag-og gyud sila posibleng makabalik sila sa trabaho.
Sukad nilingkod ang mayor niadtong Hulyo 1, ang CLOSAP nakahimo na og upat ka mga surprise drug test sa nagkadaiyang buhatan sa siyudad.
Kini naglangkob sa Mayor’s Office, Local Disaster Risk Reduction Management Office, City Traffic Management Service (CTMS) ug ang bag-o mao ang MRF. Sa kinatibuk-an 14 ka mga kawani sa siyudad ang nagpositibo sa illegal nga drugas. (/IBM)(BANAT NEWS)
- Latest
