72-anyos nakapahimulos sa Mass Wedding sa Naga

CEBU, Philippines – Miabot sa 87 ka paresan ang malampuson nga nipahimulos sa libreng kasal sa simbahan ug sa huwes nga gipasiugdahan sa Siyudad sa Naga niadtong Lunes sa buntag.

Ang mga paresan kadaghanan dugay nang nagpuyo-puyo. Sa 87 paresan  ang 14 niini gipili nga adto sa huwes magpakasal samtang 73 ka paresan ang nidesisyon nga adto gyud sa simbahan selyohan ang ilang kaminyoon pinaagi sa Sakramento sa Kaminyoon.

 Dungan nga gihimo ang seremonya sa kasal sa simbahan nga gihimo diha sa Archdiocesan Shrine of St. Francis of Assisi Parish ug ang kasal sab sa huwes.

Ang kina-edaran nga nakapahimulos sa libreng kasal mao ang magtiayong sila si Josefino Repunte, 72, ug iyang hamiling kapikas nga si Dionedesa Tecson Repunte, 60. Taas-taas nang katuigan sila nga nagpuyo sa iyang kapikas.

Dako ilang pasalamat sa kagamhanan sa siyudad nga naghuna-huna kanilang maglisud sa pagpakasal tungod sa gastuhan. Ang kombira gihimo sa gawas nga bahin sa simbahan nga gitambongan sa mga kaparyentihan ug mga opisyales sa siyudad ug simbahan.

Ang mass wedding maoy tipik ug kabahin sa mga kalihukan samtang saulogon sa Dakbayan ang ilang ika-12 ka tuig nga pagkahimong siyudad. Ubos kini sa programa ni Mayor Valdemar Chiong nga gisunod sa iyang anak nga si Bise Mayor Kristine Vannessa Chiong.

Ang mass wedding niabot na sa siyam ka tuig sukad kini unang gihimo niadtong tuig 2011. Miabot na sa 1,277 ka mga managkapuyo nga lumolupyo sa Dakbayan sa Naga ang nahimong legal ang ilang panagtipon pinaagi sa maong programa. (/IBM)(BANAT NEWS)