‘Safest city’ kalampusan sa kapolisan
CEBU, Philippines — Gihulagway ni Cebu City Police Office Director Gemma Vinluan ang pagkalakip sa Cebu City sa Top 10 Southeast Asia’s Safest Cities 2019 nga dakung kalampusan gumikan sa nindot ug aktibong partisipasyon sa kapolisan ug komunidad.
Nagtuo si Vinluan nga mosaka pa ang ranking sa Cebu City nga naa sa ika-napulo kung ang katawhan aktibong manginlabot sa crime prevention program.
Sigun ni Vinluan nga ang pag-report sa mga tawo sa mga insidente ingon man pagpahibawo sa kapolisan daku na og tabang aron i-validate ang impormasyon ug mopahigayon og operasyon.
Kagahapon gisugdan ang ika-25 nga National Crime Prevention Week nga magsugod sa Septiyembre 1 hangtud petsa 7 nga gipahigayon sa Plaza Independencia pinaagi sa Santos nga Misa.
Gitambungan ang kalihukan sa mga sakop sa Philippine National Police, Bureau of Jail Management and Penology, Philippine Drug Enforcement Agency, National Police Commission, Criminology students sa University of Cebu ug uban pa.
Nitambong sa kalihukan si Napolcom-7 Director, Atty. Homer Cabaral; Cebu City Mayor Edgardo Labella nga maoy pinasidunggang dinapit ug mga opisyal sa Police Regional Office 7.
“I salute the Napolcom on this regard this kick-off ceremony commemorating crime prevention, as I’ve said an ounce of prevention is better than a pound of cure, it is better to be preventive rather than reactive,” matud ni Labella. Si Cabaral sa iyang bahin niasoy nga ang direktiba nga gihatag nila sa kapolisan mao nga kanunay nga pagpatuman og preventive measure sa mga krimen.
Samtang asoy ni Colonel Ildibrandi Usana, Deputy Regional Director for Administration sa PRO-7 nga matag adlaw nitrabaho sila alang sa prevention sa krimen pinaagi sab sa hugot nga suporta nga gihatag sa komunidad. (GMR) (BANATNEWS)
- Latest
















