Mag-uuma gibuko-buko pagpusil, patay
CEBU, Philippines — Nakalas ang kinabuhi sa usa ka mag-uuma human kini gipusil sa wala mailhing mamumuno sa may Brgy. Bulak sa Lungsod sa Dalaguete alas nuybe sa gabii niadtong Domingo.
Ang 59-anyos nga biktima mao si Reynaldo Amancio, minyo, ug residente sa maong lugar.
Matud ni Police Staff Sergeant Arnold Frinal, ang desk officer sa Dalaguete Police Station nga ala 1:15 sa kadlawon na sila nakadawat sa impormasyon labot sa nahitabong pagpamusil diin dali dayon nila kining girespondehan.
Sa gihimo nilang pakisusi, naglakaw ang biktima paingon sa ilang panimalay dihang kalit kining gipusil sa wala mailhing mamumuno sa iyang buko-buko sa makadaghan higayon nga maoy naingnan sa iyang hinanali nga kamatayon. Wala pa usab masayri sa kapolisan ang kalibre sa armas nga gigamit sa pagpusil ngadto kang Amancio.
Sa pagkakaron blangko pa ang kapolisan sa motibo sa pagpusil kang Amancio ug padayon ang ilang gihimo nga imbestigasyon. Lakip nilang susihon ang background sa biktima. (BANAT NEWS)
- Latest