Hepe sa Lapu-Lapu District Hospital nireklamo

CEBU, Philippines – Nangayo og katin-awan ang  pangulo nga doktor  sa Lapu-Lapu District  Hospital human itudlo ni  Mayor Jonard  Ahong Chan  ang  laing doktor  nga maoy bag-ong mangulo sa maong tambalanan.

Si Dr. Joel Semblante  ang gitudlo ni Chan nga bag-ong pangulong doktor sa Lapu-Lapu District  Hospital hulip kang  Dr. Cliff Canton kinsa adto na madestino isip pangulong doktor  sa   Sta. Rosa Community Hospital nga nahimutang sa Isla sa Olango.

Si Semblante niasumer na kini sa katungdanan samtang si Canton giingong nagdumili sa pagbiya ug nagpabilin kini diha sa iyang buhatan sa extension building sa nahisgutang tambalanan.

Si Semblante nagkanayon nga nagpahimutang usab siya sa iyang buhatan diha sa main building sa maong tambalanan.

Gipasabot ni Semblante nga isip kawani sa kagamhanan sa dakbayan maoy iyang gihimo ang pagtuman sa kamanduan ni Chan.

Samtang si Canton ang nidangop ngadto sa buhatan sa Civil Service Commission  (CSC) diin  iyang giapelar  ang gihimong pagbalhin kaniya ngadto sa  Community Hospital sa  Isla sa Olango.

Si Canton kinsa naghupot og permanent  employment  status isip pangulo sa nahisgutang tambalanan sukad pa niadtong tuig 2018 ang kusganon nga nagdumili sa pagsanong sa kamanduan ni Chan samtang iyang gipaabot ang hukom sa CSR  labot  sa kasamtangan karon niyang kahimtang.

Nagtuo si Canton nga ang  gihimo nga pagbalhin kaniya adunay kalambigitan sa politika tungod kay  tinudlo man siya ni kanhi  Lapu-Lapu City Mayor Paz Radaza.

Apan si Atty. James Allan Sayson, city legal officer karon sa siyudad ang kusganong nihimakak sa maong pasangil ni Canton.

Gipasabot ni Sayson nga ang  expertise ni Canton isip usa ka surgeon maoy usa sa mga hinungdan nga pagdestino kaniya ngadto sa Sta. Rosa  sa Isla sa Olango tungod kay tinguha ni Chan nga mapalambo pa ang serbisyo sa pag-atiman sa pagpanglawas sa mga molupyo sa lugar. (/BDB)(BANAT NEWS)