Ironman magdala’g huot sa trapik

CEBU, Philippines – Gilauman nga maghuot ang trapiko sa Dakbayan sa Talisay panahon nga ipahigayon na ang Ironman Philippines, usa ka triathlon race, sunod semana.

Kini human ang taytayan sa Mananga sa Barangay Tabunok, dili pa magamit hangtud sa sunod buwan.

Si Mayor Gerald Anthony “Samsam” Gullas nagkanayon nga ang tanang sakyanan anha gyud muagi sa Natalio Bacalso Avenue sugod sa alas-5 sa buntag ngadto na sa udto sa Agosto 11.

Matud pa ni Gullas nga iyang pakigkitaan ang pangu sa Department of Public Works and Higways (DPWH) aron kumustahon ang ilang pagpalig-on sa taytayan sa Mananga.

Ang kasamtangang gigamit nga agianan ang usa ka taytayan nga paingon sa habagatang bahin. Apan giduha na kini ka lane hinungdan nga aginod ang dagan sa mga sakyanan.

Ang Talisay South Road Properties (SRP) maoy gamiton nga bike route alang sa dakong sports event dinhi sa Sugbo.

Hinuon si Gullas dili pa kasulti kun unsa ang mahitabo kun muingon ang taga DPWH nga dili pa nila makaya nga mahuman ang taytayan sa dili pa ang kalihukan. —/LPM (BANAT NEWS)