Duha gipatay, gisunog nailhan na

CEBU, Philippines — Duha ka patay nga lawas nga napalgan nga gisunog sa bukiran nga barangay sa Putat, Lungsod sa Tuburan ang giila na sa ilang kabanay.

Ang gipamatay nailhan nga sila si Nicko Baricar, taga Alaska Centro, Mambaling, ug John Paul Galon, taga Kalunasan, Dakbayan sa Sugbo.

Matud ni Police Lt. Colonel Ismael Gauna, hepe sa Tuburan Police Station, nga inisyal nga giila sa mga paryente ang namatay nga sila si Baricar ug Galon.

Aron pagseguro, iya kining giawhag nga magpakuha og swab sample alang sa DNA test kung motakdo ba kini ngadto sa nakuha nga sample gikan sa duha ka patay nga lawas.

Si Carmelita Tierny, inahan ni Baricar, ang niabot sa PNP Crime Laboratory aron magpakuha og swab sample alang sa DNA test.

Si Tierny nitug-an nga katapusan niyang nakit-an ang iyang anak niadtong nilabay nga semana ug daku ang iyang pagtuo nga buhi pa kini ug dili kini mao ang namatay kay walay timailhan nga mao kini bisan ug nakuhaan kini og couple ring nga anaa ang pangalan sa kanhi kapuyo.

Gitug-an ni Tierny nga kanhi priso ang anak niini tungod sa kasong murder ug frustrated murder sulod sa 13 ka tuig ug sa nilabay nga tuig lang kini nakagawas.

Si Baricar, sakop sa Tau Gamma Phi, ug katapusan nga gikakuyog niini mao ang usa ka Isidro Nudalo Jr. alyas Botex, igsuon ni Tongol Nudalo, ang nailang drug lord sa Sugbo.

Si Bortex wala na igkita human nawala og pipila ka adlaw ang namatay.

Si Atty. Vicente Fernandez II, usa sa mga abogado ni Baricar, nitug-an sa nilabayng tuig pa na-acquit ang kaso niini nga murder, diin dul-an sila sa 13 ka tuig naglantugi sa korte.

Si Baricar, operator sa mobile disco nga gipanag-iya sa inahan niini nga nahimutang sa Alaska, Mambaling. (GMR) (BANAT NEWS)