Programa ni Magpale gustong mapadayon

CEBU, Philippines — Malaumon si outgoing Vice-Governor Agnes Magpale nga mapadayon sa sunod nga administrasyon ang mga programa alang sa kababayen-an ug kabatan-onan sa Probinsya sa Sugbo.

Sa termino ni Magpale isip bise gobernador, usa sa gipanghingusgan niya nga programa ang pagpanalipod sa kababayen-an ug kabatan-onan ilabi na ang mga biktima sa pag-abuso.

Subay niini nakapatukod ang Kapitolyo og Women and Children Development Center sa Sudlon, Lahug sa Dakbayan sa Sugbo, nga moatiman sa kababayen-an ug kabatan-onan nga biktima sa pag-abuso.

Laing panghinaut ni Magpale nga mapadayon usab ang My Home Center sa Tayud, Consolacion diin giatiman ang kabatan-onan nga nakalapas sa balaud o ang mga Children in Conflict of the Law (CICL).  Matud ni Magpale nga ang My Home Center gikan kini sa pagdumala sa Justice Peace and Integrity of Creation – Integrated Development Center, Inc. (JPIC-IDC) nga gitanyag sa Probinsiya sa Sugbo apan wala kini dawata sa panahon sa administrasyon ni incoming governor Gwendolyn Garcia kaniadto.

Sumala ni Magpale nga ubos na sa administrasyon ni outgoing ug incoming vice governor Hilario Davide III gidumala sa Kapitolyo ang maong pasilidad.

Gitataw ni Magpale nga wala masayang ang kwarta sa probinsiya sa maong pasilidad.

“There’s no money wasted, they can check how we run it, there is no graft and corruption and even si Marivic Garces should know kay siya man gihapon atong gisaligan dinha,” matud ni Magpale. (GMR) (BANAT NEWS)