Gipatay atubangan sa eskwelahan durugista?

CEBU, Philippines — Gidudahang nalambigit sa ginadiling drugas ang lalaki nga gipusil patay sa atubangan sa eskwelahan sa San Isidro Elementary School sa Barangay San Isidro, Dakbayan sa Talisay niadtong Biyernes sa buntag.

Ang biktima nga si Jason Narido, hingkud ang panuigon nga taga Sitio Tiago, Brgy. San Isidro sa maong siyudad, nakaangkon og samad pinusilan sa iyang ulo ug kalawasan human gipusil sa wa mailhing mamumuno.

Si PO3 Glenn Besande, imbestigador sa Talisay City Police Station nagkanayon nga buwag sa iyang asawa ang biktima ug karon aduna kini laing kapuyo.

Iya sab nahibaw-an nga wala kini trabaho hinungdan nga mao kini ang maghatud ug kuha sa iyang anak nga lalaki sa maong tunghaan.

Apan pipila sab ka mga opisyal sa barangay mitataw nga nitumaw sab ang pangalan sa biktima nga nalambigit sa ginadiling drugas.

Asoy pa ni Besande nga nakadungog siya nga tighagbong og ilegal nga drugas ang biktima.

Busa ang ilang imbestigasyon nakatutok sa maong motibo kay mahimo man nga aduna kini nakaengkwentro sa ilegal nga negusyo.

Hinuon si Besande nagkanayon nga padayon ang ilang pagpanguha og testigos aron mailhan gyud ang mihimo sa krimen.

Si Narido giingong naghatud sa iyang anak sa tunghaan ug gipusil-patay sa nagmotorsiklong mga lalaki. (/DILT)(BANATNEWS)