Dili angay mahadlok ang opisyal sa Tanke

CEBU, Philippines — Dili angay mahadlok sa ilang seguridad ang mga opisyales sa Barangay Tanke, Dakbayan sa Talisay ilabi na sa kampanya batok ilegal nga drugas. Kini maoy gipasalig ni Konsehal Gail Restauro, ang chairman sa committee on Peace and Order sa maong siyudad.

Nasayran nga sa miaging semana, gipatay si Nonilito Abay, hepe sa tanod sa Tanke sa wala pa mailhing mamumuno.

Si Abay aktibo sa pagtabang sa kapolisan sa pagsumpo sa ilegal nga kalihukan sa ilang lugar.

Una niini, ang suod nga higala ni Abay maoy unang gipatay nga usa sab ka barangay tanod niadtong buwan sa Enero.

Si Restauro nagkanayon nga normal ra nga mahadlok ang tawo apan kon walay gihimo nga ilegal, dili kini angay nga mahadlok.

Giangkon sa maong opisyal nga daku pa gyud kaayo nga trabahuon aron mapuhag ang mga ilegal nga kalihukan sa Tanke bisan paman sa sunod-sunod nga mga pagpangronda nga gihimo sa kapolisan.

Nanghinaut siya nga unta ang kadasig sa mga opisyal nga misuporta sa kampanya batok ilegal nga drugas magpabilin kini. (BANAT NEWS)