14 ka tawo sikop sa drug raid ug checkpoint

CEBU, Philippines — Nikabat ngadto sa P600 mil ang balor sa ilegal nga drugas ang nasakmit sa Mambaling Police Drug Enforcement Unit ug Carmen Police Station sa gipahigayon nga buy-bust operation niadtong Sabado sa gabii.

Unang operasyon nahitabo diha sa Sitio Larema, Barangay Mambaling diin nasikop  si Samuel Pastoril Belarmino, 34-anyos, residente sa C. Padilla, Barangay Duljo-Fatima ug Pamela Padilla Gonzales, 43-anyos, residente sa Sitio Larema.

Si Belarmino ug Gonzales giingong nasakmitan og duha ka medium nga pakete ug tulo ka dagkong pakete nga gituohang ilegal nga drugas diin nitimbang kini ngadto sa 85 gramos nga nibalor ngadto sa P578,000.

Samtang sa Barangay Dawis Norte ug sa Poblacion, Lungsod sa Carmen nasikop ang duha ka menor kinsa mga residente sa managlahing lugar sa nahisgutang lungsod.

Nasakmit gikan sa duha ka menor ang tulo ka gagmay’ng pakete ug laing unom ka gagmay’ng pakete nga gituohang ilegal nga drugas nga nitimbang ngato sa .12 gramo ug .21 gramo ug nibalor tanan ngadto sa P2,223 mil.

Sa laing bahin, napulo ka tawo ang nadakpan human nasakmiti og shabu atol sa gipahigayong check point sa kapolisan sa Presinto 1 sa Mandaue City  Police Office (MCPO)diha sa dalan Zuelleg, North Reclamation Areas sa Barangay Centro niadtong Sabado sa gabii hangtud sa Domingo sa kadlawon.

Ang mga nasikop mao sila si Gerden  Alontoda, 30, taga Barangay Ibabao, Lungsd sa Cordova,  Teresito Vinculado, 35, taga Lungsod sa Minglanilla, Joseph Hayno, 20, taga Barangay Basak, Dakbayan sa Lapu-Lapu, Genesis Loquellano,19, taga Lungsod sa Tabogon ug  Dennis  Lumapas, 22.   taga Pajo,  Dakbayan sa Lapu-Lapu.

Dugang nadakpan mao sila si Geomar Intong, 24, taga Lungsod sa San Fernando, Cebu, Warren Tagsip, taga Suba  Basbas, Junnel Naparrete, 35, taga Umapad, Dakbayan sa Mandaue, Mark dela Peña, 24, taga Umapad, Rennel Lopez, 24, taga Barangay  Lamac, Lungsod sa Consolacion, Virgilio Albaracin, 24, taga Barangay  Tingob, Dakbnayan sa Mandaue ug Darrel Young, 32, taga Duljo-Fatima, Dakbayan  sa Sugbo.

Nasakmit gikan sa maong mga dinakpan ang 18 ka gagmay’ng paketeng shabu ug drug paraphernalia nga gihuptan sa mga dinakpan ug gi-impound usab ang mga motorsiklo sa maong mga suspetsado. (Romeo T. Limpangog/BDB)(BANATNEWS)