Duha ka nag-refill og butane sikop

CEBU, Philippines – Duha ka lalaki nga nag-refill og mga butane ang nasikop sa kapolisan niadtong Miyerkules sa hapon diha sa Camella Homes, Barangay Linao, Dakbayan sa Talisay.

Ang mga nadakpan mao sila si Arnel Merela Alon, 30-anyos, minyo, lumad nga taga Domingag, Zamboanga del Sur ug si Regie Pinton Jayma, 19-anyos, ulitawo, lumad nga taga Batasan Island, Tubigon, Bohol.

Ang kapolisan sa Talisay nakadawat og taho labot sa kalihukan sa mga dinakpan.

Ang duha ka dinakpan walay napakita nga dokumento nga nagpamatuod nga legal ang mao nilang negosyo.

Sa pagsulod sa mga operatiba, naatlan pa ang duha nga nag-refill sa mga lata sa butane.

Nakompiska sa kapolisan ang 132 ka butane canister diin ang 24 niini gisudlan na og LPG, duha ka LPG cylinder nga adunay timbang nga 50 kilos ug usa ka scale device.

Gidili ang matang sa negosyo ilabina nga walay mga permit gikan sa gobiyerno gumikan kay peligro kini sa sunog. (/BDB)(BANAT NEWS)