Sinug sa Casa Gorordo nahimo nang tradisyon

CEBU, Philippines — Wala panumbalinga sa Turang Dance Troupe ang ulan kagahapon ug padayon silang mipasundayag alang sa tinuig na nga Sinug sa Casa Gorordo isip pahinungod ngadto kang Sr. Sto. Niño. Ang maong grupo natukod pinaagi ni Estelita “Nang Titang” Diola kinsa mitaliwan na niadtong Marso 2013 sa edad nga 88-anyos ug nailhan sa mga Sugbuanon isip “Keeper of the Sinulog Dance and Beat”.

Si Richeleo Colina, apo ni Nang Titang ug dugay na nga manayaway, mao nasay mitudlo. Siya nagkanayon nga gusto niyang tapigan ang maong sayaw alang sa mga mosunod pa nga mga henerasyon sumala sa panugon sa iyang apohan.

Dili lang kay ang pagpreserbar sa mga nabuhat  ni Nang Titang ang katuyuan kon nganong aktibo si Colina kabahin sa Sinug sa Casa Gorordo ang hisgutan.

Matud niya nga siya ug ang ubang mananayaw mapasalamaton ngadto ni Sr. Sto. Niño sa talento ug sa mga grasya nga ilang nadawat.

Si Florencio Moreño, curator sa Casa Gorordo Museum nagkanayon nga tradisyon na sa pamilyang Gorordo nga kada Lunes human sa kapistahan sa Balaang Bata, magpa-sinug sila diin ang pasayawon mao ang grupo sa pamilya ni Nang Titang. Ug kay mitaliwan naman si Nang Titang, ang iyang mga kaliwat gikan sa lain-laing henerasyon ang mipadayon niini.

Matud ni Moreño nga gusto sa Ramon Aboitiz Foundation Inc. (RAFI) nga ipadayon ug ipreserbar ang maong mga tradisyon kay importante kini sa museyo ug kabahin na usab kini sa mga kapanulundan sa Sugbo. Sama og moro-moro ang pasundayag sa Sinug sa Casa Gorordo diin aduna kini istorya gawas sa sayaw ug duwa.

Lahi ang tukar ug sayaw sa sinug kon itandi sa popular nga sayaw sa matag Sinulog nga makit-an sa kadalanan ug sa sports center. Joevelon G. Pinay (BANAT NEWS)