Traffic management system sa Cebu City palambuon

CEBU, Philippines — Ang kagamhanan sa Dakbayan sa Sugbo nagtinguha sa pagpalambo sa traffic management system sa siyudad.

Si Konsehal Jerry Guardo, chairman sa committee on environment, energy, transportation, communication and other utilities nagkanayon nga nangita sila og pamaagi aron pagpalambo sa traffic management system.

Usa sa ilang gilantaw mao ang pag-privatize sa operasyon sa parking sa siyudad pinaagi sa pakig-alayon sa kompaniya nga Tokagawa Global Corp.

Matud ni Guardo nga adunay sestima ang Tokagawa nga ma-monitor sa siyudad ang income sa parking operations.

Ug kong madayon ang maong plano ang siyudad mokita og P8.7 milyones sa usa ka tuig sa parking operations.

Gibutyag ni Guardo ang average income sa siyudad sa parking naa sa P8.3 milyones.

Ang mga parking aid walay angayang kabalak-an tungod kay i-absorb sila sa kompaniya ubos sa minimum nga suholan ug hatagan usab sila og incentives ug benefits.

Hinuon 68 porsyento lang sa parking area sa siyudad ang ipadumala sa Tokagawa ang uban ang kagamhanan sa siyudad maoy modumala.

Si Solomon Say, chief financial officer sa Tokagawa nibutyag nga aduna sila'y parking system alang sa “checking in” ug “checking out” sa parkers nga mo-transmit og real time traffic information o parking information sa ilang website diin ang siyudad dunay access niini alang sa audit purposes.

Pinaagi sa ilang technology nga gitawag og handheld parking operating system ma-track kon pila ang nakolekta gikan sa parking matag dalan ingon man parking collector.

Ug gumikan niini sayon nalang usab ang pag-track sa performance sa mga individual collectors ug individual streets real time.

Gamiton sa kompaniya ang city ordinance labot sa pay parking nga P20 matag oras sa sakyanan ingon man motorsiklo.

Gipahibawo usab  nga ilang i-rehabilitate ang kadalanan ug mga signage ug walay gastohon ang siyudad niini. (/BDB)(BANATNEWS)