Prebilihiyo dili katungod aron magpatahod

CEBU, Philippines — Naghinam-hinam na ako dili lang kada oras, adlaw o mga bulan kondili kada gutlo sa umaabot nga ika-100 ka gatos nga kasumaran sa legasiya sa akong amahan nga si Don Vicente Gullas, ang founder sa University of the Visayas, ug sa The Freeman, nga gitukod sa akong Uncle Paulino Gullas Dungan niadtong 1919. Nindot kaayong paminawon ni bisan kinsang makasaksi niining duh aka mga makasaysayanong hitabo. 

Ang akong mga ginikanan, si Papa Inting ug Mama Pining mga maayong ginikanan; mapahiubsanon ug mapasalamatong alagad sa Kahitas-an.  Karon lang nako nahunahunaan nga ako, ug akong mga igsuong sila si Inday Sering ug Mayor Eddie bulahan kaayong nakabaton og mga ginikanang sama kanila.

Maayong modisiplina si Mama Pining, maayo usab siyang mangita para sa among panginahanglan, siya ang among kusog ug maoy nagbugkos sa among pamilya aron dili kami magkabuwagbuwag niadtong panahon sa gubat.

Wala siya’y pagduhaduha pagbunal ug pagpaluhod kanamo sa mongos kon duna kami nabuhat nga kasaypanan.

Samtang si Papa Inting wala sukad nakabunal kanamo bisan gagmay pa kami. Suod kaayo silang duha ni Inday Sering. Simple ra kaayo ang iyang panglantaw para kanamo. Buot niyang mamahimong usa ka magtutudlo si Inday Sering  si Eddie, mangalagad sa katilingban sa bisan unsang paagi, samtang ako, isip maoy kinamanghuran gusto niyang akoy modumala sa unibersidad.

Abogado si Papa apan usa siya ka magtutudlo sa kinailadman sa iyang kasingkasing. Basin dili lang siya usa ka magtutudlo kondili us aka taong handurawanon. Karong mga gutloa, kaming mga managsuon makaingon nga kaliboan ka mga estudyante sa Visayan Institute nga karon mao na ang UV ang nakapahiluna na sa ilang tagsa-tagsa ka mga kinabuhi. Dili man tuod tingali ang tanan nagsuot og korona apan harianon lang gihapon kay nagdala sila sa espiritu sa Visayanian bisan asa pa sila dad-a sa ilang mga tiil.

Maayo unta nga kaming ikaduhang henerasyon sa mga Gullas may nabuhat bisan gamay sa pagamuma sa legasiya sa among mga ginikanan.  Bawon namo matag adlaw ang ilang pagmatuto kanamo nga magpabiling mapahiubsanon, tawhanon, mobati sa uban ug masinabtanon.

Apan bisan pa man sa nanglabay nga mga katuigan, nabantayan nako nga bisan og may mga tawong nagduha-duha kon unsa ka tinuod kining akong gipamulong, ako kining gipuy-an “it is better to be kind than being right.”

Gitanom sa among alimpatakan nga dili porke may pribelihiyo sa kinabuhi mahimo nang manunob ug magpatahod sa uban. Mao kini karon ang hagit sa ikatulong henerasyon sa mga Gullas, pagtampo aron mapabilin ang legasiya sa ilang mga katiguwangan.

“Do their share in keeping the legacy of our forebears alive and burning, we owe…they owe that much and more to them.”/IBM (BANATNEWS)