Giingong mga adik nag-unay; worship alang sa mga recovering addicts

CEBU, Philippines – Mga giingong adik kinsa wala magkasinabot ang nagsinumbagay ug niresulta sa pagpanunggab diha sa Sitio Mananga 1, Barangay Tabunok, Dakbayan sa Talisay niadtong Martes sa gabii.

Ang biktima mao si Carlos Quijano, 47, taga Cantao-an, Siyudad sa Naga nakaangkon og samad dinunggaban sa iyang lusong-lusong daling gidala ngadto sa Talisay City District Hospital.

Ang mga suspetsado mao sila si Albert Tapinit, habal-habal driver ug Lupe Alconten parehong taga Siyudad sa Naga ang daling nisibat human sa hitabo.

Si PO2 James Cabrillos sa Talisay City Police Station nibutyag nga sa wala pa mahitabo ang pagpanunggab nagkalalis una ang tulo ug dayon nagkasinukmagay apan usa sa mga suspek nibunot og hait nga hinagiban dayon hansak ngadto sa lusong-lusong sa biktima.

Ang biktima nangangkon nga gitulis siya sa duha ka suspek apan matud ni Cabrillos nga kuyog ang tulo diha sa maong lugar aron manuyop apan wala magkasabot hangtud nga nagkaaway.

Dugang ni Cabrillos nga buot mogawas sa tambalanan ang biktima apan wala tugoti sa mga doktor tungod kay giingong naa sa delikado ang kahimtang niini.

Sa laing bahin, ang "Surrender to God" program sa Archdiocese of Cebu ug "Love of God Community" nga gipangulohan ni Fe Barino adunay usa ka dakong kalihukan nga himuon karong umaabot adlaw nga Domingo nga gitawag og "Be Intimate with God" diin usa kini ka adlaw nga kalihukan nga tambongan sa mga recovering addict sa Sugbo.

Matud pa ni Barino nga adunay praise and concert worship nga ipahigayon ug mga nagkadaiyang services nga tambongan sa mga recovering addict lakip usab sa ilang mga pamilya.

Gawas sa mga kalihukan nga giandam adunay ipahigayon nga Santos nga Misa nga pangulohan ni Archbishop Jose Palma sa ala 1:00 sa hapon.

Si Barino nagkanayon nga ang mga nalambigit sa ilegal nga drugas dili kinahanglang pamatyon hinungdan aduna silay alternatibo nga gihimo pinaagi niining "big day" nga pagahimuon na nila unya matag buwan.

Si Jay Francisco, director sa maong programa nitug-an nga sa sinugdanan nag-focus sila sa recovery sa mga adik ug kinahanglan ang katawhan magsabot sa pagtabang sa mga naulipon sa ginadiling drugas aron kini mahatagan og kahigayonan nga mausab.

Adunay registration fee nga P100 ang maong kalihukan alang sa paniudto sa mga motambong diin sa pagka karon aduna nay 500 ang nipadangat nga buot moapil. (Rowena D. Capistrano/BDB)(BANAT NEWS)