Gidaro sa sakyanan, usa patay

CEBU, Philippines – Usa ang patay samtang usa ang kritikal human gidaro sa sakyanan nga ang drayber nakatulog sa may South Road Properties (SRP) sa Cansojong, Dakbayan sa Talisay kagahapon sa alas 4 sa kaadlawon.

Ang namatay mao si Geneses Hisula, hingkod nga taga Lungsod sa Minglanilla samtang naangol si Jegga Mahinay, 27, taga Proper Sudlon 2, Siyudad sa Sugbo.

Ang dayber sa Isuzu D-Max nailhan nga si Warren Gillera, 27, taga Villa Agustin 2, Tungkil, Minglanilla.

Si PO2 Ruel Detuya sa Talisay City Traffic Division nibutyag nga naglakaw daplin sa karsada padulong sa trabahoan ang duha ka biktima.

Apan si Gillera giingong nakatulog nga nagmaneho ug nisaka sa gutter ang sakyanan diin ang mga biktima naglakaw hinungdan nga nangalagpot.

Gidala sa Talisay City District Hospital ang duha apan si Hisula nabugtuan sa iyang kinabuhi samtang kritikal si Mahinay. Gikan nagbilar sa haya sa iyang higala si Gillera ug padulong na unta kining mopauli sa ilang panimaye.

Boluntaryo nga nitahan ang drayber nga nakaligis ug gibalhug sa bilanggoan samtang nagpaabot nga pasakaan og kaso sa kabanay sa iyang naligsan.

Samtang gilusad sa Probinsiya sa Sugbo ang programang Sugbo Likay Disgrasya (SULID) aron paghatag og kahibawo sa mga tinun-an kalabot sa traffic management.

Ang kapin 500 ka tinun-an sa Lipata Elementary School sa Lungsod sa Minglanilla ang unang gipaubos sa seminar ubos sa maong programa.

“Basic nga pahibalo sama sa asa dapita eksaktong pagtabok, unsay angay buhaton kun naa ka sa intersection unya unsay buot pasabot ani nga signage,” matud ni Jonathan “Joy” Tumulak, focal person on traffic management sa probinsiya.

Si Bokal Christopher “Dong” Baricuatro, chairman sa Provincial School Board, nagplano nga isugyot ngadto kang Provincial Schools Division Superintendent Rheamar Angtud nga maggahin og pipila lang ka minutos matag adlaw sa klase sa mga eskwelahan nga tudloan ang mga tinun-an kalabot sa traffic rules.

Plano sab sa PSB nga sunod tuig manghatag sila og school supplies sa mga tinun-an sa elementarya ubanan na kini og traffic rules ug signages nga iagi sa binisayang pulong. (Le Phyllis F. Antojado/GMR)(BANAT NEWS)