P47M nagasto sa PDRRMO sa mga proyekto ug progama

CEBU, Philippines — Moabot ngadto sa P47 milyones ang kantidad sa nagasto sa Provincial Disaster Risk Reduction and Management Office (PDRRMO) alang sa mga programa ug proyekto niini sulod sa duha ka quater sa tuig 2018.

Base sa report sa pangulo sa PDRMMO, Baltazar Tribunalo Jr. atol sa Provincial Disaster Risk Reduction Management Council (PDRRMC) meeting tulo ka major items ang nagastohan sa ilang buhatan nga gilangkuban sa disaster prevention and mitigation, preparedness and response ug recovery and rehabilitation.

Apil sa mga programa ug proyekto nga nagastohan mao ang pag-establisar sa integrated multi-hazard early warning system predator project nga nagkantidad og P25 milyones.

Pagtukod og evacuation centers sa mga munisipyo sa Carmen, Pilar, isla sa Camotes ug Sta. Fe isla sa Bantayan diin ang maong proyekto niabot ngadto sa P18.3 milyones ang nagasto.

Dugang nga evacuation centers usab ang gitukod diin 75 porsiyento na nga nakompleto sa Lungsod sa Sibonga nga niabot ngadto sa P5.8 milyones.

Ang PDRRMO nagpalit usab og duha ka bag-ong rescue trucks, backhoe loader, dump trucks ug boom trucks nga niabot sa P52 milyones.

Sa rehabilitation ug recovery program ang PDRRMO adunay gi-proposed nga playground facilities project nga itukod diha sa San Remegio, Daanbantayan ug Bantayan.

Ubos sa rehabilitation mao ang P2 milyones nga Technical-Vocation (TechCoc) trainings ug provision nga “tool kits” alang sa 103 ka beneficiaries niini.

Ang quick response fund sa PDRRMO nga P54 milyones wala pa hinuon kini magasto.

Dugang ni Tribunalo nga gikan sa Enero hangtod sa bulan sa Hunyo 37 porsiyento sa kinatibuk-an sa P126.7 milyones nga pundo sa PDRRMO ang nagasto na. (BANAT NEWS)