Nagmenudo og gasolina gidakop

CEBU, Philippines — Nagpadayon ang kampanya batok sa namaligya og menudo nga gasolina  ug niining dili luwas nga LPG refilled butane canisters didto sa Danao City tungod sa kapeligro niini.

Nadakpan ang 37-anyos nga si Julieto Mahilum,  diha sa Sta. Cruz, Barangay Dunggoan tungod sa paglapas sa PD 1865 kon illegal nga pagbaligya ug refilling sa petroleum products kagahapon sa buntag.

Matud ni Police Officer 1 Gypsy Miro, Desk Officer sa Danao City Police Station may mitawag kanila ug nipahibalo bahin sa naninda og gasolina ug butane. Dali silang mipahibalo sa Bureau of Fire Protection ug gironda ang lugar.

Nadakpan si Mahilum human wala kini napakita nga mga legal nga dokumento gikan sa  Department of Energy nga nag-ingong otorisado siyang makabaligya og mga petroleum products ug butane.

Nasakmit sa kapolisan ang 40 litrong gasolina,  van mga adunay 14 ka sako nga adunay 955 butane canisters ug laing napulo ka karton nga dunay sulod nga butane.

Ang dinakpan kasamtangan usa karon nga gitanggong sa prisohan samtang gipaabot ang pagpasaka og kaso niini. (/IBM)(BANATNEWS)