Rewinding shop naugdaw sa sunog

CEBU, Philippines — Naugdaw sa sunog ang usa ka rewinding shop nga nahimutang sa Barangay Ibabao-Estancia, Mandaue City, lapas sa tungang gabii kaniadtong Domingo.

Si Fire investigator Edson Dapal mitug-an nga napaubos nila sa third alarm ang pagkasunog sa Chrest Sun International Stators Rewinding shop mga ala 1:34 ang takna.

Matud ni investigator Dapal nga ang tupad nga bakery sa nasunog nga establisimeto, misilaob na usab unta apan dali kining napawong sa mga bombero.

Si SFO1 Noel Codilla mitug-an nga hingpit nilang napawong ang sunog lapas na sa alas dos sa kaadlawon, ug walay kinabuhing nakalas, o tawo nga naangol sa maong hitabo. Ang sunog nagbilin og kadaot sa kabtangan nga gibanabana nga mokantidad og P975 mil. Adunay nakatug-an sa kabomberohan nga posibleng nakaingon sa sunog mao ang alambre nga wala na’y panit ug gituohan nga nabag-id sa atop nga sin sa rewinding shop. (BANAT NEWS)