Nagtaud og atop nakuryentehan patay
CEBU, Philippines — Patay ang 38-anyos nga lalaki human nakuryentehan samtang nagtaud og atop sa Phase 1, Block 8, Lot 5 sa Camella Homes, Barangay Lawaan 1, Dakbayan sa Talisay niadtong Sabado sa alas 3 sa hapon.
Ang namatay mao si Boyet Mendez, minyo nga nagpuyo sa Barangay Biasong sa nahisgutang siyudad apan lumad nga taga Barangay Sinandigan, Ubay, Probinsiya sa Bohol.
Si SPO1 Jason Del Campo sa Talisay City Police Station nibutyag nga nagtrabaho sa panimay ni Johnjay Caba ang biktima uban ni Joel Cutamora.
Asoy pa niya nga nagtaud sa atop ang biktima diin duol ra sab kaayo sa linya sa kuryente sa Visayan Electric Company (VECO).
Matud ni Del Campo nga ang namatay nagsige na gyud siya og estorya sa iyang kauban nga hikapon ang linya sa VECO.
Apan wala magdugay masipang buto ang ilang nadungog ug nalabay na ang biktima gikan sa ilang nahimutangan sa ikatulong andana sa panimay sa ilang amo.
Si Del Campo nitataw nga nagkayo pa ang senina ni Mendez sa ilang pag-abot hinungdan nga gidali nila kini og dala sa Vicente Sotto Memorial Medical Center.
Apan pipila ka oras ang nilabay nakabsan gyud sa kinabuhi ang biktima.
Dugang pa ni Del Campo nga naa sa 23,000 boltahe ang nakaigo ni Mendez hinungdan nga kini nalabay ug naparok sa karsada nga iyang natugpahan. (BANAT NEWS)
- Latest
