Drug users nga kawani sa Lapu-Lapu gitaktak

CEBU, Philippines — Gitaktak ni Lapu-Lapu City Mayor Paz Radaza ang lima ka kawani sa dakbayan human sila mamatud-i nga mga tiggamitan og gidiling drugas atol sa gipahigayong drug test.

Matud ni Radaza nga dili gyud siya gusto nga adunay mga drug users sa mga kawani sa dakbayan sa Lapu-Lapu. Ang siyudad sa Lapu-Lapu adunay mga 4,000 ka kawani.

Wala na lang hinuon ilha ni Radaza ang mga gitaktak nga kawani, apan mipasidaan kini sa ubang kawani sa siyudad nga likayan gyud nga sila malambigit sa gidiling drugas.

Ang upat sa mga gitaktak nga kawani mga Job Order workers, samtang  kaswal ang usa kanila.

Ang pagkadiskubre sa maong mga kawani nga sila mogamit og drugas nagumikan sa pagpahigayon og kinalit nga drug test kaniadtong Disyembre 20.

Si Radaza miingon nga kon ang usa ka kawani sa kagamhanan naulipon na sa drugas, mahimong apektado na ang iyang panerbisyo sa katawhan. Ang balaod nagtugot nga ang mga kawani nga kaswal mahimong dihadiha kini nga tangtangon kon sila mapositibo sa paggamit og gidiling drugas, apan kon mga regular nga kawani, imbestigahon ug hatagan sila’g higayon pagtubag sa dili pa taktakon. (RUB)  (BANATNEWS)