Radaza dismayado sa Dengue Vaccine

CEBU, Philippines — Nimando si Lapu-Lapu City Mayor Paz Radaza sa hingpit nga pag-monitor sa mga bata nga nabakunahan.

Dili mominus sa 40,000 ka bata ang nabakunahan ilabi na nga sila ang pilot area sa maong programa.

Dismayado ang mayor sa uwahing kalambuan sa naasoy’ng programa nga nagbutang sa peligro sa kinabuhi sa mga bata hinungdan nga tinguha niini karon nga makigkita sa opisyal sa Department of Health aron mangayo og katin-awan aron magamit usab sa pagpasabot sa mga Oponganon.

Gimanduan sa mayor ang City Health Office ug tanang barangay health workers sa pag-monitor sa mga bata nga nabakunahan ug giawhag usab ang mga ginikanan sa pagtaho dayon kung adunay mamatikdan sa panglawas sa ilang mga anak.

Gihangop ni Radaza ang gipahigayon nga imbestigasyon aron mahatagan og katin-awan ang isyu ug angayan sab manubag ang mga nalambigit kung ugaling masuta nga adunay sipyat nga nahimo.

Samtang suportado ni Cebu Archbishop Jose Palma ang imbestigasyon kabahin sa Dengvaxia Vaccine human nakahatag kini og kabalaka sa kadaghanan ilabi na sa nahatagan sa maong bakuna.

Sumala pa sa Arsobispo nga sa una pa lang nabalaka na gyud sila ilabi na may kalabutan sa mga ipanghatag nga bakuna hinungdan nga isalig na lang nila sa tukma nga awtoridad sa pagdeterminar kung unsaon paghunong ug unsay buhaton sa maong bakuna ilabi na kung maghatag kini og komplikasyon.

Dugang ni Palma nga angay lang nga adunay imbestigasyon nga ipahigayon ug dili lang basta-basta ang paghatag sa bakuna nga wala gitestingan pag-ayo aron dili makahatag og risgo sa katawhan ug aron usab makatubag ang mga angayan nga manubag sa maong lapso kung aduna man. (BANAT NEWS)