Nakuryentehan nipilit sa punoan sa nangka

CEBU, Philippines — Nakuryentehan patay ang 16-anyos nga batang lalaki human niya nasabod ang karaang poste sa kuryente sa Camotes Electric Cooperative, Inc. (CELCO) samtang namutol og sanga sa nangka sa Sitio Ilang, Barangay Villahermosa, Lungsod sa Pilar kagahapon.

Ang biktima giila nga si Yves Romo, residente sa maong dapit ug tinun-an sa grade 11.

Ang imbestigador nga si PO3 Erwin Rebada sa Pilar Police Station niingon nga nisaka sa punoan sa nangka ang bata aron unta mamutol og sanga ug mga dahon niini nga maoy ipakaon sa iyang binuhi nga kabaw. Apan matud pa nga sa dihang naputol na niini ang usa ka sanga, natandog ang live wire sa maong poste nga maoy hinungdan nga nakuryentehan ug mipilit sa maong kahoy ang biktima.

"Nakuha siya (ang biktima) sa mga rescuers na," si Rebada niingon.

Butyag sa maong polis nga karaan na ang maong poste nga kahoy ug tupong ra sa nangka nga tupad niini nga maoy gisak-an sa biktima.

Gibutyag sa maong polis nga nihatag na og pinansyal nga tabang ang tagdumala sa CELCO ngadto sa pamilya sa bata ug gitataw nga walay kasong ipasaka batok sa maong kompanya. (BANAT NEWS)