Patay sa rambol

CEBU, Philippines — Patay ang usa ka 21- anyos nga lalaki biktima sa pagpanunggab sa gikaaway nga grupo sa mga batan-on sa Barangay  Pitogo, Lungsod sa  Consolacion sa Domingo sa kaadlawon, duha sa mga suspek ang nadakpan samtang nakaikyas ang usa.

Si Police Officer 2 Jorge Tapales sa Consolacion Police Station miila sa namatay nga mao si Jonard Ponce, taga Barangay Tayud sa maong lungsod.

Samtang ang mga nadakpang suspek mao sila si Cesar  Arnais, 19, taga Barangay Mantuyong, Dakbayan sa Mandaue ug  Arnel  Malazarte, Pateros, 19, taga Barangay Paknaan sa mao gihapong dakbayan.

Gipangita pa ang ilang kauban nga naila lang sa pangalan nga Cedric. Matud pa ni Tapales nga kuyog sa biktima ang iyang mga barkada ug nag-inom sa Tambayan Consolacion Food Park sa Barangay Pitogo.

Didto nagka-atbang og pwesto ang duha ka grupo apan giingong nagkasuyaay ang duha ka grupo nga nisangpot sa karambola ug  pagpanunggab gamit ang buak nga botelya.

Naglumba sa pagpanagan ang grupo sa mga batan-on apan nadakpan sa bouncer si Arnais samtang si Malazarte nadakpan sa follow up operation sa mga polis apan nakaikyas ilang kauban.

Sa laing bahin, tungod sa mga kagubot nga nalambigit ang kabataan gihugtan sa kapolisan sa dakbayan sa Danao ang pagpatrolya panahon sa kagabhion.

Si Police Officer 2 Thomas Perez sa Danao Police Station miingon nga ang grupo sa mga batan-on nga ilang malabyan wala nila dakpa kondili ilang gipapauli ug gipahimangnoan nga dili maglatagaw panahon sa kagabhion.

Gimando ni Supt. Geralde Perale,hepe sa Danao City Police Station  pagpatrolya panahon sa kagabhion tungod sa mga nahitabong pagpamusil diha sa barangay Poblacion diin naangol silang Gilbert Aranco Avila, 24, ug usa ka 16-anyos nga dalagita nga  parehong nagpabilin pa sa tambalanan.

Nailhan lang sa pangalang Jaguar ug Peter nga giingong sakop sa  Datom Squad Gang ang mga suspek. -/IBM (BANAT NEWS)