Brgy election giatangan sa SONA

CEBU, Philippines - Nanghinaut ang Commission on Elections nga maapil nga hisgutan ni Presidente Rodrigo Duterte sa iyang State of the Nation Address ang kabahin sa Barangay ug Sangguniang Kabataan elections karong tuiga.

Matud ni Provincial Election Supervisor, Atty. Lionel Marco Castillano, nga sa pagkakaron nagpadayon pa gihapon ang ilang preparasyon alang sa umaabot nga piniliay karong Oktubre.

Nagsugod na sila og imprinta sa listahan sa mga botante.

Matud ni Castillano nga kung ipauswag gyud sa Presidente ang piniliay, mamahimong ma-priority bill ang pag-postpone niini ug sila sa Comelec dili na mopadayon sa pag-award sa winning bidder nga maoy mo-supply sa mga materyales nga gamiton sa eleksiyon.

“Otherwise magkalas ang Comelec sa kwarta sa gobiyerno. Like ballpen mogahi na, ang ink mogahi na, ang ballot if ma-printed na, lahi na ang petsa, daghan utrohunon, hopefully maapil sa priority measure para ang Comelec pud maka-relax na and if mapasar ang balaud makabalik na mi pagparehistro,” matud ni Castillano.

Si Castillano nagkanayon nga sa pagkakaron, ang   computerized election list, gi-postpone usab ang paglihok niini gikan sa gikatakda unta nga sugdan sa katapusang semana karong     buwana.

Apan tungod kay dili tanang opisina sa Comelec adunay supplies, ug ang ubang buhatan adunay deperensya ang mga printer, nidesisyon ang Comelec nga iuswag kini ngadto na sa Agosto 21.

Samtang nagpahigayon og pagbansay-bansay ang Civil Disturbance Management sa Police Regional Office-7 isip pagpangandam sa SONA ni Duterte karong Lunes.

Gilangkuban ang maong pagbansay sa Cebu City Police Office, Cebu Police Provincial Office, Mandaue City Police Office, Lapu-Lapu City Police Office ug Regional Public Safety Battalion.

Bisan pa man adunay mga ginagmay’ng sayop, gidayeg gihapon sa bag-ong director sa PRO-7, Chief Supt. Jose Mario Espino, ang maong pagbansay tungod kay mga maayo kini.

Pahimangno sa direktor nga magpabiling kalma ug likayan ang pagkaagresibo tungod kay mao kini ang mamahimong hinungdan nga mosamot ang kagubot.

Ang tigpamaba sa Armed Forces of the Philippines - Central Command nga si Col. Medel Aguilar sa iyang bahin nibutyag nga andam sab ang armadong kusog sa posibilidad nga adunay dakong kagubot nga mahitabo sa maong adlaw.

“To our rallyists, please don't distract and drag our attention away from the real and present threat our country faces right now. Allow us to finish the task as early as possible. Pakiusap lang po,” matud ni Aguilar. - /GMR) (BANAT NEWS)