Sakop sa demolition team gidunggab og sidewalk vendor

CEBU, Philippines - Nagtingkagol sa detention cell sa Presinto 1 sa Mandaue City Police Office (MCPO) ang usa ka sidewalk vendor nga gidakop human kini manunggab og mga sakop sa demolition team sa may dalan P. Burgos, Brgy. Centro sa Dakbayan sa Mandaue, pasado ala-una sa hapon niadtong niaging adlaw.

Si PO2 David Omambac sa MCPO Presinto 1 niila sa sidewalk vendor nga gidakop nga si Jocelyn Botar, taga Brgy. Basak sa maong dakbayan.

Giingong ang mga sakop sa demolition team nga naglakip sa duha ka mga biktima nga sila si Johnber General, taga Brgy. Casuntingan ug Regudo Kiang, taga Brgy. Paknaan, nanghawan sa mga naninda daplin sa nahisgutang dalan.

Nasayran nga gibadlong na ang maong mga sidewalk vendors nga dili alihan ang dalan. Adunay uban nga nituman apan aduna say wala manumbaling. Hinungdan nga gipanguha sa demolition team ang mga baligya nga gipahimutang daplin sa karsada nga maoy gikasuk-an sa pipila ka manindahay nga naglakip sa suspek nga si Botar.

Si General ug Kiang nga maoy nanguha sa mga baligya kalit nga gipanunggab ni Botar nga maoy nakaingon sa pagkasamad sa ilang mga bukton.

Daling gidala sa tambalanan ang mga biktima samtang gidakop sa mga polis ang tindera. (BANAT NEWS)