26 “hugawan” gipangkiha
CEBU, Philippines - Gipasakaan na og kaso ang 26 ka mga tawo nga nagpataka og panigarilyo ug paghugaw-hugaw niadtong nilabay nga eleksyon, sila kadtong wala manumbaling sa tiket nga giisyu kanila sa mga kawani sa Cebu Environmental and Sanitation Enforcement Team.
Matud pa ni Grace Luardo, ang pangulo sa CESET niabot ngadto sa 42 ka mga tawo ang naisyuhan nila og citation ticket diin 34 littering ug walo ang smoking.
Apan sa 42 ka mga naisyuhan og tiket, ang 16 lang niini ang niadto sa ilang buhatan aron bayran ang multa sa kalapasan nga ilang nahimo. Duha niini nanigarilyo sa voting area ug 14 ang nagpataka og labay og basura.
Dugang pa ni Luardo, nahan-ay na ang iyang mga affidavits sa ipasakang mga kaso batok sa 26. Sila nakalapas sa City Ordinance 1361 ug City Ordinance 2241.
Gitug-an ni Luardo, mao ra gayud ang bugtong nilang tinguha ang pagpabilin kanunay sa dakbayan nga hapsay ug limpyo ang palibot.
Human sa eleksyon niadtong Mayo 9, ang Department of Public Service mipahibalo nga nakahipos sila og kapin usa ka libo ka tonelada nga basura gikan sa mga voting areas. (BANAT NEWS)
- Latest
