Misis,kabit sakpan

CEBU, Philippines - Gipadakop sa bana ang iyang asawa hasta ang matud pa kabit niini human ang duha iyang naabtan nga nagdulog sulod sa ilang lawak diha sa ilang panimalay sa Brgy. Luray Dos, Dakbayan sa Toledo.

Ang 41 anyos nga bana nga giingong kanhi Overseas Filipino Worker (OFW) nangayo og tabang sa kapulisan sa Toledo human niya nasakpang adunay laing lalaki ang iyang 40 anyos nga asawa nga usa ka public school teacher sa Toledo.

Sila si Police Officer 3 Celso Makidato ug Police Officer 3 Dante Hilo daling  niresponde sa reklamo sa bana ug ilang nasikop ang ginang ug ang 40 anyos niining kabit nga usa ka V-hire driver.

Sa pakighinabi sa Banat News kang Hilo, base usab sa pamahayag sa bana nga dugay na kining nakadawat og taho nga adunay laing lalaki ang iyang asawa ug natambagan kini nga dakpon sa akto ang duha.

Tuod man nilakaw kini sa ilang panimalay ug hilom nga nibalik ug dihang iyang namatikdan nga anaa gyud sa sud sa ilang lawak ang duha mitawag dayon siya sa kapolisan.

Matud ni Hilo, pag-abot nila sa lawak naabtan gyud nila ang duha nga nagtapad sa pagdulog sulod sa lawak sa ilang panimalay hinungdan nga ilang giposasan ug gipaslak sa prisohan. Ang magtiayon adunay tulo ka mga anak.

Gisuwayan sa pakighinabi ning tigbalita ang asawa kalabot sa maong hitabo apan wala  kini motubag sa mga pangutana ug wala moluwat og pamahayag. Gipasakaan na og kasong adultery ang asawa samtang concubinage ang gipasaka sa kabit niini. (BANAT NEWS)