Mga konsehal sa siyudad gipasidunggan

CEBU, Philippines - Gipasidungan ni acting Vice Mayor Nestor Archival ang pipila ka konsehal sa Dakbayan sa Sugbo nga adunay labing daghang resolusyon ug ordinansa nga napasar sa 2015 atol sa regular session kagahapon.

Sa privilege speech ni Archival siya nagkanayon nga angayan gyud pasidunggan ang mga konsehal nga nakahatag ug nakatampo  sa dakbayan sama nilang Konsehal Margarita Osmeña nga adunay 831 ka resolusyon, Sisinio Andales, 425 ug Lea Japson, 337.

Si Japson adunay siyam ka ordinansa ug gisundan ni Konsehal Alvin Dizon nga may walo ug lima kang Nida Cabrera.

Sila Konsehal Andales, Alvin Arcilla, Gerardo Carillo, Eugenio Gabuya, Japson ug Mary Ann delos Santos ang gihatagan og pasidungog tungod sa “perfect attendance” sulod sa 71 ka session sa konseho.

Base sa Sangguniang Panlungsod Library Division nga gidumala ni Roy Alix, adunay kinatibuk-an nga 1,858 ka resolusyon ug 22 ka ordinansa ang napasar sulod sa 71 ka session.

Gipasidunggan usab ang tulo ka konsehal nga mahuman na sa ilang termino sulod sa siyam ka tuig nga sila si Konsehal Roberto Cabarrubias, Japson ug Richard Osmeña.

Kini ang unang higayon nga gipasidunggan ang mga konsehal sa ilang natampo sa kaayuhan ug paglambo sa dakbayan. (Sheriza Mae R. Uy/GMR) 

Kaupat gipusil, nalandig sa tambalanan

Gipusil upat ka higayon sa nagkadaiyang parte sa lawas sulod sa boarding house ang usa ka gidudahang tiggamitan og shabu diha sa District 4, Pulpogan, Consolacion.

Base sa inisyal nga imbestigasyon sa kapolisan nga gipangulohan ni PO2 Rhexter Armenion, giila ang biktima nga si Randie Cavan Delima, residente sa mao’ng lugar.

Matud ni SPO3 Arthur Ariate nga gipusil upat ka higayon ang biktima sulod sa gi–abangang boarding house pasado alas 3:30 kagahapon sa buntag.

“Basin wala ni mang-lock ang biktima sa iyang pultahan ug bintana kay dali ra man nakasulod ang suspek,” dugang ni Ariate.

Gituohang nigamit ang suspek og .45 caliber pistol base sa mga kabhang sa bala nga na-recover sa kapolisan.

Gidala sa mga silingan ang biktima sa Vicente Sotto Memorial Medical Center gamit ang barangay multicab.

Gibutyag sa kapolisan nga may nakit-an sila’ng drugs ug repacking paraphernalia.

Sa pagkutlo niini’ng balita, nalandig pa sa VSMMC ang biktima. (BANAT NEWS)