Una’ng pagkalawat ni Vidal lab-as pa
CEBU, Philippines – Gipaambit ni Cebu Archbishop Emeritus Ricardo Cardinal Vidal sa Banat News team ang iya’ng kasinatian atol sa una niya’ng pagkalawat niadto’ng 33rd International Eucharistic Congress sa tuig 1937 nga gipahigayon sa Manila isip labing una sa Pilipinas.
Matud ni Vidal nga lab-as pa sa iya’ng panumduman ang iya’ng kasinatian human sa 79 na ka tuig ang nakalabay.
Si Vidal ang mopakalawat sa singko mil ka mga first communicants atol sa 51st IEC nga ipahigayon sa Cebu City Sports Center sa alas kwatro karong Sabado sa hapon.
Hulagway nga kuha sa Luneta mao na la’y bugtong handumanan nga gihuptan ni Vidal atol sa iya’ng una’ng pagkalawat.
Gipadayag ni Vidal nga niadto’ng panahona wala pa sa iya’ng hunahuna nga mamahimo’ng alagad sa Simbahan.
Daku ang kalipay ug pasalamat ni Vidal nga nakaabot pa siya sa laing hugna sa daku nga panagtigum sa Eukaristiya dinhi sa nasud ug siya pa gyud ang mopakalawat sa mga first communicants.
Awhag sa cardinal sa mga bata nga una’ng mokalawat sa lawas ug dugo ni Kristo sa pagsabot ug pag-andam sa kaugalingon sa pagdawat sa lawas ug dugo ni Kristo.
Sa pangedaron karon ni Vidal ug bisan usahay luya na ang iya’ng lawas apan dili gyud kini mopalta sa pagsaulog sa Santos nga Misa matag adlaw sa kapilya sulod sa iya’ng pinuy-anan. – /GMR) (BANAT NEWS)
- Latest
